Ungeheia vo Loch Ness

Des Ungeheia von Loch Ness (dt.Ungeheuer), zu dems aa Nessie sogn, soi a Viech odaraa a Gruppm vo Viecha sei, de in Loch Ness in da Näh von da Stod Inverness in Schottland lebt. Nessie wiad meist oisa Oat Seeschlaungan bschriem, mid aana Läng vo bis zu zwanzg Meta. Waunsas iwahaupt gibt, warat des a Kryptid, des is uneafoaschtes Viech, zu dem da Mensch ned zuwekummt, sowos wia da Bigfoot oda da Yeti.

De meistn Wíssnschoftla und sunstign Kapazunda maanan jo, doss de gaunzn Gschichtln iwa Nessie obsichtlich odara unobsichtlich Foischmöödungan san, oda doss d Leit iagnwöche gwehnlichn Viecha aafoch ned dakennt haum, wäus grod de Sunn im Aug ghobt haum oda zlaung beim Wiatn woan. So oda so is da Mythos aa wiatschoftliche Mezzie fia de Gengd, wäu da See heitzdog a Haptzüü is fian Tourismus in Schottland. Im Summa, in da Saurn-Guakn-Zeid, taucht jo des Ungeheia olle Bod ois Schlogzäun in de Zeitungan auf.